Шупашкар районӗнчи Кӳкеҫре пурӑнакансем халӑх тетелӗнче урамсемпе тротуарсем пӑрлакки, нумай хутлӑ хваттерсен картишӗсенчи ҫулсене тасатса тӑманни пирки кӑмӑлсӑрланса ҫыраҫҫӗ.
Посёлокри Первомайски урамӗнчи 9-мӗш ҫурт, ав, тахҫантанпах, урам тирпейлекенсӗр пурӑнать иккен.
«Кӗркуннеренпе ӑна курман! Картишне тасатмаҫҫӗ, подъездсем тирпейсӗр. Ҫурта тытса тӑма тесе эпир тӳлекен укҫа ӑҫта каять? Такам, тен, укҫа та илсе тӑрать пулӗ. Е Гоголӗн «Мёртвые души» хайлавӗнчи пек-ши?» — тесе ҫырнӑ Светлана Карпунина ятлӑ хӗрарӑм.
Ӗнер Шупашкарти хӑш-пӗр урамра шыв юхса выртнӑ. Ку хыпара «Руль умӗнче» порталта пӗлтернӗ.
Эгер бульварӗнчен пуҫласа Хевеш тата Ленинла комсомол урамӗсем патне ҫитичченхи лаптӑкра ӗнер шарлаттарса шыв юхнӑ. Ун пекки хулара маларах та пулнӑ. Ӗнер, кӑрлач уйӑхӗн 8-мӗшӗнчи ҫӗрле, Кӑкшӑм урамӗнчен Яковлев проспектне кайнӑ ҫӗрте шыв юхса выртнӑ.
Ҫавсен сӑлтавӗ коммуналлӑ хуҫалӑхпа ҫыхӑнма пултарнӑ. Кун пек шартламара шыв пӑрӑхӗсем ҫурӑлса каясси те часах.
Коммуналлӑ хуҫалӑх ӗҫченӗсем ӗҫлесе ҫитерейменни пирки ҫынсем тӗнче тетелӗнче тата Патшалӑх пулӑшӑвӗсен порталӗ урлӑ ҫийӗнчех пӗлтереҫӗ. Унта мӗн ҫырнисене Чӑваш Республикин Регион управленийӗн центрӗ сӑнаса тӑрать. Ҫул-йӗр ҫинчи лару-тӑру пирки Ҫӗнӗ ҫул умӗн 400 ытларах хутчен евитленӗ. Вӗсем пирки хула администрацине ҫийӗнчех пӗлтернӗ.
Шупашкарта пурӑнакан Анастасия С., ав, сӑмахран, Бауман урамӗнчи чарӑнура картлашкана тасатса тӑманнишӗн кӑмӑлсӑрланнӑ. Татьяна М. вара 42-мӗш ача пахчипе 36-мӗш шкул хушшинчи Хевеш урамӗнчи тротурара тасатса тӑманни пирки систернӗ.
Ҫынсем евитленине, Регион управленийӗн центрӗ ура ҫине тӑратнине кура коммуналлӑ хуҫалӑх ӗҫченӗсем ҫак тата ытти кӑлтӑка ҫийӗнчех пӗтернӗ.
Ӗнер, кӑрлач уйӑхӗн 3-мӗшенче, Шупашкарти нумай хутлӑ хӑш-пӗр ҫуртри хваттерсем ӑшӑсӑр тӑрса юлнӑ. Унта пурӑнакансен телейне, вӑхӑтлӑха.
Хулан ҫӗнӗ кӑнтӑр микрорайонӗнчи темиҫе теҫетке ҫурта ӑшӑ пама пӑрахнӑ. Ҫав 76 ҫурт Трактор тӑвакансен проспектӗнче, Ленинла Комсомол тата Кадыков урамсенче вырнаҫнӑ.
Хулара пурӑнакансене пӗрлехи диспетчер службинче ӑнлантарса панӑ тӑрӑх, ӑшӑ сечӗ сиенленӗ. Ҫавна май ҫуртсенче ҫӗрӗпех ашӑ пулман, ир енне хваттерсем ӑшӑ ҫитнӗ.
Шӑмӑршӑра вӑтам шкулта вӗренекен ачисем урокра курткӑпа лараҫҫӗ. Ҫавӑн сӑлтавӗ котельнӑй йӗркеллӗ ӗҫлеменнипе ҫыхӑннӑ.
Район администрацийӗнче лару-тӑрӑва ҫирӗп тӗрӗслесе тӑнине ӗнентернӗ май вӗренӳ процесне чармассине хыпарланӑ.
Шкула тӗплӗн юсанӑ хыҫҫӑн классенчен пӗри сивӗ чухне йӗркеллӗ ӑшӑнса ҫитеймест иккен. Ҫакӑ ачасемшӗн те, учительсемшӗн те меллӗ мар. Шкула, ача пахчине тата больтницӑна ӑшӑпа тивӗҫтерсе тӑракан котельнӑй йӗркеллӗ ӗҫлемест-мӗн. Класра халӗ ӑшӑтмалли хатӗр вырнаҫтарнӑ.
Ӑшӑ ыйтӑвне тӗпрен татса пама модульлӗ котельнӑй вырнаҫтарни пулӑшӗ тесе ӑнлантарнӑ вырӑнти администрацире.
Ҫав вӑхӑтрах класра сивӗ пирки прокуратура тӗрӗслев пуҫарни те паллӑ.
Чӑваш Енре «Ӑшӑпа тивӗҫтерессин диспетчер служби» информаци тытӑмӗ ӗҫлесе кайнӑ. Асӑннӑ программа сетьсенче тата объектсенче сиксе тухакан инкеклӗ лару-тӑрӑва сӑнаса тата тӗрӗслесе тӑма май парать.
Республика Элтеперӗн Администрацийӗн пресс-служби пӗлтернӗ тӑрӑх, ҫӗнӗ служба ресурссемпе тивӗҫтернин тухӑҫлӑхне ӳстерме пулӑшӗ.
2023 ҫулӑн иккӗмӗш ҫур ҫулӗнче диспетчер тытӑмӗпе ӑшӑ энергийӗн 520 ҫӑлкуҫне тата потребительне ҫыхӑнтарса пӗтересшӗн. Паянхи куна диспетчер служби 130 объекта тӗрӗслесе тӑрать.
Кӳкеҫри нумай хваттерлӗ хӑш-пӗр ҫуртра пурӑнакансем хваттерсенче сивӗ тесе «Контактри» «Кугеси | Общественный совет» (чӑв. Кӳкеҫ | Халӑх канашӗ) пабликра пӗлтернӗ.
Пост авторӗ Людмила Григорьева Совет урамӗнчи 78-мӗш ҫуртри хваттерсенче сивӗ тесе хыпарланӑ. «Йӗркеллӗ ӑшӑтма хӑҫан пуҫлӗҫ? Эпир Германире пурӑнмастпӑр вӗт. Газӗ Раҫҫейӗн, хваттерсене ӑшӑтнӑшӑн сахал мар тӳлетпӗр, пӗрех шӑнса ларма тивет», — пӑшӑрханса ҫырнӑ хӗрарӑм.
Ҫавӑн пек лару-тӑру ытти ҫуртра та иккен. Комментарисем тӑрӑх хакласан, Совет урамӗнчи 72-мӗш, 73-мӗш, 84-мӗш, Первомайски урамӗнчи 4-мӗш ҫуртсенче те хваттерсенче сулхӑн-мӗн.
Чӑваш Енри нумай хваттрелӗ ҫуртсенче ҫутӑ счётчикӗсене ылмаштарасси малалла пырать. Ҫавӑн пек тума 2018 ҫулхи раштав уйӑхӗнче йышӑннӑ 522-мӗш номерлӗ федераци саккунӗ хистет.
Нумай хваттерлӗ ҫуртсенчи электросчётчиксене кӑҫалхи ҫулталӑк вӗҫне ылмаштарса пӗтермелле.
Республикӑри мӗнпур районпа хулара уйрӑм ҫынсене 5 пин счётчик лартса памалла, кунсӑр пуҫне тата нумай хваттерлӗ ҫуртсенчи ҫутӑ тӑкакне шутлакан 850 ытла приборпа трансформатор токне виҫекен 600 комплект вырнаҫтарӗҫ.
Ӗҫшӗн хваттер хуҫисен укҫа тӳлемелле мар. Ҫӗнӗ йышши счётчиксем ҫутӑ мӗн чухлӗ ҫуннине хӑйсемех кирлӗ ҫӗре ҫитерӗҫ.
Чӑваш Енри коммуналлӑ хуҫалӑхра ӗҫлекенсем асӑннӑ отрасль объекчӗсене хӗле хатӗрлессипе ҫине тӑраҫҫӗ. Ӗнерхи кун тӗлне илсен, ӗҫе 59,9 процент чухлӗ пурнӑҫланӑ.
Ӗҫ хӑвӑртлӑхӗ енчен Йӗпреҫ (29,0%), Сӗнтӗрвӑрри (31,4%), Ҫӗмӗрле (32,5%) тата Ҫӗрпӳ (34,6%) районӗсем юлса пыраҫҫӗ.
Коммуналлӑ хуҫалӑх объекчӗсене хӗле хатӗрлессипе Улатӑр, Элӗк, Патӑрьел, Комсомольски, Хӗрлӗ Чутай, Шӑмӑршӑ, Тӑвай районӗсем тата Улатӑр хули малта. Вӗсенче палӑртнӑ ӗҫ калӑпӑшӗн 70 процентне пурнӑҫланӑ.
Шупашкар районӗн центрӗнче, Кӳкеҫре, пурӑнакансем, кранран, мазутлӑ шыв юхнине пӗлтереҫҫӗ.
Тӗнче тетелӗнчи халӑх ушкӑнӗсенчен пӗринчи «Кугеси | Общественный совет» (чӑв. Кӳкеҫ | Общество канашӗ) пабликра сӑмаха ҫирӗплетме сӑнӳкерчӗк те вырнаҫтарнӑ.
Пост авторӗ ӗнентернӗ тӑрӑх, шыв мазут шӑршиллӗ ҫеҫ мар, мазутлӑ та. Унпа алла ҫусан вӑл йӗр хӑварать.
«Карл Маркс урамӗнчи 112-мӗш ҫуртра та шыв мазут шӑршиллӗ, анчах хальлӗхе аллах вараламасть-ха», — калаҫӑва хутшӑннӑ пӗри. Советски урамри 98-мӗш ҫуртра та иртнӗ эрнере шыв мазут шӑршиллӗ пулнӑ.
+4.3 °C